រឿង នគរបាលស័ក្ដិ៣លួច អាយ ផេត គេថា« ច្រឡំ ដៃ  មិនមែនលួច » កំពុងក្លាយជាប្រធានបទក្ដៅក្នុងបណ្ដាញសង្គមហ្វេសប៊ុក ! 

ដោយ ៖ សុខ សាន្ត
ថ្ងៃទី01 ខែ06 ឆ្នាំ2019 ម៉ោង 10:44 AM

ភ្នំពេញ ៖ ករណីនគរបាលពាក់ស័ក្ដិ៣វ័យក្មេងបន្លំលួចយកអាយផេតនៅក្នុងហាងវីងវេរលុយនៅខណ្ឌទួលគោក កាលពីថ្ងៃទី៣០ខែឧសភានោះ កំពុងក្លាយជាប្រធានបទក្ដៅនៅក្នុងបណ្ដាញសង្គមហ្វេសប៊ុក បន្ទាប់ពីជនសង្ស័យរូបនេះចូលសារភាពកំហុសប្រគល់អាយផេតឲ្យគេវិញហើយពោលពាក្យថាច្រឡំ ដោយពុំមានកសាងសំណុំរឿងទៅតុលាការទេជាហេតុនាំឲ្យមហាជាបញ្ចេញមិតិរិះគន់ធ្ងន់ជាបន្តបន្ទាប់ ។

ពាក់ព័ន្ធបញ្ហានេះមហាជនបានលើកឡើងថា ខ្លួនជាមន្ដ្រីនគរបាលហើយមានតួនាទីបុណ្យស័ក្ដិចំណែកគ្រួសារក៏ជាមានទ្រព្យធន់ទៀតផងព្រោះគេបានឃើញ ហេង ហាប់ អាយុ ២៤ឆ្នាំនៅនាយកដ្ឋានព្រំដែនទឹក រូបនេះសម្ញែងរថយន្ដរថយន្ដរែងរ៉ូវើ សេរីទំនើប និយាយរួមជាមនុស្សស្ថិនក្នុងគ្រួសារស៊ី វីល័យទៀតផង តែលោកមិនគួធ្វើអំពើថោកទាបមានដៃមានជើងលួចយករបស់គេចឹងទេ ។ បន្ទាប់ពីម្ចាស់គេមើលឃើញក្នុងកាមេរ៉ាសុវត្តិភាពរួចបានដកយករូបភាពនេះមកបង្ហោះ ផ្អើលពេញបណ្ដាញសង្គម សង្គមទើបជនសង្ស័យចូលខ្លួនសារភាពប្រគល់អាយផេតឲ្យម្ចាស់គេវិញ ចចារបញ្ចប់រឿងនៅត្រឹមកន្លែងសមត្ថកិច្ច ដោយពោលពាក្យថាច្រឡំទៅវិញ ប៉ុន្ដែបើតាមសកម្មភាពក្នុងវីដេអូឃ្លីបដែលបានបង្ហោះនោះគឺជាចេតនាលួចស្ដែងៗតែម្ដង អ្នកដែលឃើញវីដេអូនេះអ្នកណាក៏ថាជាការលួចដែរ មិនមែនជារឿងច្រឡំអីទេ ។

មហាជនបានលើកឡើងយ៉ាងខ្លីថា បើករណីនគរបាលរូបនេះលួចបែរជាថាច្រឡំបែបនេះ ហើយរួចខ្លួនពីសំណាញ់ច្បាប់ ចុះបើគេវាយបែកក្បាលរួចថាវាយច្រឡំ ឬក៏សម្លាប់មនុស្សច្រឡំតែមួយម៉ាត់នឹងរួចខ្លួន ចុះបើពលរដ្ឋសាមញ្ញៗវិញអាចឆ្លើយថាច្រឡំវឹងបានទេ ប្រសិនបើប្រព្រិត្តបទល្មើសអ្វីមួយរួចហើយនោះ ។

សម្រាប់ប្រជាពលរដ្ឋវិញ បានចាត់ទុកថា ករណីនេះជានិទណ្ឌភាពមួយ ដែលគួរនាំគ្នា លុបបំបាត់ និងយកច្បាប់ជាធំ, នរណាប្រព្រឹត្តខុសត្រូវតែទទួលទោសតាមច្បាប់ មិនត្រូវយកតួនាទីបុណ្យស័ក្ដិលុយមុខមាត់ ទូទាត់ជាមួយច្បាប់បានទេ ហើយមន្ដ្រីថ្នាក់លើគ្រាក់ៗក៏មិនត្រូវលូកដៃអន្ដរាគមន៍ខុសទំរង់ច្បាប់បែបនេះដែរ ។ ប្រជាពលរដ្ឋខ្លះទៀត បានបញ្ចេញយោបល់ថា «បង្កើតច្បាប់មកធ្វើអ្វី បើមិនអាចអនុវត្តចំពោះអ្នកធំនោះ?»។ ក្រៅពីប្រជាពលរដ្ឋ និងអ្នកលេងបណ្តាញសង្គមយក្សមួយនេះ សម្រាប់អ្នកនយោបាយវិញ ក៏មិនអាចទ្រាំនឹងចំណាត់របស់ សមត្ថកិច្ចនាយកដ្ឋានព្រហ្មទណ្ឌនោះបានដែរព្រោះ មិនព្រមកសាងសំណុំរឿង បញ្ជូនទៅកាន់តុលាការ បែរជាដោះលែងឲ្យត្រឡប់ទៅផ្ទះវិញយ៉ាងដូច្នេះ។

ករណីដោះលែងបែបនេះក៏មានមន្រ្តីរាជរដ្ឋាភិបាលមួយចំនួន និងមន្រ្តីសមត្ថកិច្ចជាន់ខ្ពស់ដទៃទៀត បានផ្តល់យោបល់ថា ហេតុអ្វីមិនបញ្ជូនទៅកាន់តុលាការសិន ដើម្បីកាត់ទោស ឬរកមេធាវីការពារខ្លួនដើម្បីដោះបន្ទុក ដើម្បីបង្ហាញថា រាល់ជនល្មើសទាំងអស់នឹងរងការកាត់ក្តី នៅស្ថាប័នតុលាការ មិនគួរណាមន្រ្តីសមត្ថកិច្ចជាអ្នកអារ-កាត់នោះទេ។

ជាមួយគ្នានេះ លោក ពេជ្រ ស្រស់ សមាជិកក្រុមប្រឹក្សាពិគ្រោះ និងផ្តល់យោបល់ និងជាប្រធានគណបក្សយុវជនកម្ពុជា នៅថ្ងៃនេះបានចេញសារមួយជូននាយឧត្តមសេនីយ៍ នេត សាវឿន អគ្គស្នងការនគរបាលជាតិ ចំពោះចំណាត់ការដ៏ស្រាលនេះ ទៅមន្រ្តីនគរបាលដែលប្រព្រឹត្តបទល្មើស។ ដោយលោកបាន យ៉ាងដូច្នេះថា «ករណីនេះមិនត្រូវបញ្ចប់ដោយបែបនេះទេ ពីព្រោះទង្វើនេះ គឺជាទង្វើបន្ថោកបន្ទាបដល់កេរ្តិ៍ឈ្មោះ មន្រ្តីប៉ូលីសផ្សេងទៀត ហើយក៏ឲ្យមហាជនអស់ជំនឿលើ អ្នកអនុវត្តន៍ច្បាប់ផងដែរ ដូច្នេះគឺក្នុងនាមរូបខ្ញុំ ជាអ្នកឃ្លាំមើលការអនុវត្តន៍ច្បាប់ ខ្ញុំសូមស្នើដល់ឯកឧត្តម នេត សាវឿន និងអ្នកអនុវត្តន៍ច្បាប់ដទៃទៀត សូមចាត់ការបុគ្គលនេះ តាមវិន័យច្បាប់ឲ្យបានតឹងរឹងបំផុត ដើម្បី ធានាបាននូវ ការពង្រឹងអំណាចច្បាប់ និងលើកមុខមាត់ នៃស្ថាប័នកងកម្លាំងឡើងវិញ»។

នាយឧត្តមសេនីយ៍ នេត សាវឿន អគ្គស្នងការនគរបាលជាតិ បាន ឲ្យដឹងកាលពីព្រឹកថ្ងៃទី៣១ ខែឧសភាថា «បន្ទាប់ពីបញ្ចប់ការសួរនាំនៅ នាយកដ្ឋាននគរបាលព្រហ្មទណ្ឌ មន្ដ្រីនគបាលរ ត្រូវបានអនុញ្ញាតឲ្យត្រឡប់ទៅផ្ទះវិញហើយ ក្រោយធ្វើកិច្ចសន្យាអប់រំ និងមានអ្នកធានាត្រឹមត្រូវ។ ករណីនេះ មិនមែនជាករណីលួចទេ គឺជាករណីច្រឡំ ហើយភាគីទាំងពីរទាំងខាងម្ចាស់ហាង និងមន្រ្តីនគរបាល ក៏បានសម្របសម្រួលបញ្ចប់ហើយដែរ។ ម្ចាស់ហាងក៏មិនបានដាក់ពាក្យបណ្តឹងអ្វីដែរ»។

មហាជននៅតែមានជំនឿចិត្តថា មន្រ្តីនគរបាលរូបនេះ នឹងត្រូវរងការកាត់ទោសពីច្បាប់ជាក់ជាមិនខាន បើមិនកាត់ទោសគេទេនោះច្បាប់ក៏គ្មានតម្លៃដែរ ព្រោះច្បាប់ចែងមកមិនមែនការពារមនុស្សមួយក្រុមនោះទេពោលគឺពលរដ្ឋរស់នៅក្នុងសង្គមត្រូវតែគោរពច្បាប់នេះទាំងអស់គ្នា ៕

ដោយឡែកក្រោយពីមានបប្រតិកម្ម អ្នកនាំពាក្យ អគ្គស្នងការនគរបាលជាតិបានចេញប្រកាសព័ត៌មានឲ្យដឹងថា ផ្អែកតាមការពិនិត្យលើស្ថានភាពគ្រួសាររបស់មន្ត្រីនគរបាលរូបនោះ ឃើញថា មានជីវភាពធូរធារដែលពុំមានហេតុផលណាបញ្ជាក់ថា គាត់មានការខ្វះខាត រហូតដល់ប្រព្រឹត្តអំពើចោរកម្មឡើយ ខណៈពេលដែលមន្ត្រីនគរបាលរូបនោះ ពេលច្រឡំយក Ipad គឺ លោក ហេង ហាប់ បានជិះរថយន្តផ្ទាល់ខ្លួនម៉ាក Range Rover ។

ទោះបីយ៉ាងណា អគ្គស្នងការដ្ឋាននគរបាលជាតិ បានណែនាំដល់សាម៊ីអង្គភាព ទទួលយកមន្ត្រីនគរបាលរូបនោះ ទៅអប់រំណែនាំឡើងវិញនិងប្រគល់ជូនឪពុកម្តាយ ដើម្បីយកទៅពិនិត្យព្យាបាល ។

photo_2019-05-30_17-10-11 photo_2019-05-30_17-10-45 (2) photo_2019-05-30_17-10-45 photo_2019-05-30_17-19-41 photo_2019-05-30_17-19-42 (2) photo_2019-05-30_17-19-42 photo_2019-05-31_13-33-19